عرض مشاركة واحدة
  #1  
قديم 04-15-2013, 08:44 PM
الصورة الرمزية ahmed_allaithy
ahmed_allaithy ahmed_allaithy غير متواجد حالياً
عضو مؤسس_أستاذ جامعي
 
تاريخ التسجيل: May 2006
المشاركات: 3,802
افتراضي عاش القاضي المصري عاش

بمناسبة الحكم بإخلاء سبيل مبارك وموسم البراءة للجميع (ما عدا الثوار)
عاش القاضي المصري عاش
أصل الشعب ده ماتربَّاش
احكم اضرب إسجن برَّأ
ناس الثورة دي ناس أوباش
عاش القاضي المصري عاش.
شالوا النايب حطوا النايب
ألف قضية في رقبة شايب
ذل وقهر ومصر تصرَّخ
بس قاضينا دا أعمى طشاش
عاش القاضي المصري عاش.
فَقَر الدولة، وسرطن شعبه
وِف محكمته هز حواجبه
كَسَف القاضي يا حبة عيني
أصل جنابه طلع قشاش
عاش القاضي المصري عاش.
طلع القاضي بتاع قوانين
مِ اللي لا تعرف ملة ودين
يخرب بيت العدل بتاعك
دم الشهداء ف حكمك باش
عاش القاضي المصري عاش.
الأحرار ع السجن قـوام
والسفاح نضرب له سلام
واحنا قاضينا ضارب برشام
أو متعكَّم عَيْنـي وكـاش
عاش القاضي المصري عاش.
الداخلية عينيها دي باكسة
والقضائية عليها مية وكسة
واللي هيدعي يقول يا عدالة
يطلـع م المولـد ببـلاش
عاش القاضي المصري عاش.
حسـرة عليكم يا الثـوَّار
قلبوا الثورة دي حفلة زار
فيم بسلامته دا قاضي الثورة؟
هي دي ثورة طاش يا ما طاش؟
عاش القاضي المصري عاش.
القوانين معمولة عمولة
والأحكام جاهزة ومغسولة
متـأيِّفـة ع القـد واتاري
كلها شلة من الأوغـاش
عاش القاضي المصري عاش
عاش القاضي المصري عاش.
__________________
د. أحـمـد اللَّيثـي
رئيس الجمعية الدولية لمترجمي العربية
تلك الدَّارُ الآخرةُ نجعلُها للذين لا يُريدون عُلُوًّا فى الأَرضِ ولا فَسادا والعاقبةُ للمتقين.

فَعِشْ لِلْخَيْرِ، إِنَّ الْخَيْرَ أَبْقَى ... وَذِكْرُ اللهِ أَدْعَى بِانْشِغَالِـي

رد مع اقتباس