كُتَّـاب آخـر زمـن

تقليص
X
 
  • تصفية - فلترة
  • الوقت
  • عرض
إلغاء تحديد الكل
مشاركات جديدة
  • ahmed_allaithy
    رئيس الجمعية
    • May 2006
    • 3961

    كُتَّـاب آخـر زمـن

    كُتَّـاب آخـر زمـن




    بيقولوا عليه حَـرِّيف
    وبيكتب قال تصانيف
    والوحي عليه بِيْشُرّ.
    أُقسم بالله تخاريف
    وجَنابُه ده عقله خفيف
    غضبان في الطالعة ونازلة
    عامل قال رامبو مخيف.




    إنْ عَكّ يقول إبداع
    وعامل لي دي فيها بتاع.
    يا أديب يا ابو مُخ كبير
    أيش جاب الفار لِسْباع؟
    اعقل؛ دا العقل شراع
    مخَّك محتـاج تزييت
    بُرِّيه منُّـك، يا لطيف!




    من إمتى يا واد حِدَّايَة
    كتاكيت وبترمي غواية؟
    دا انت يا متعوس من يومك
    ناقص، محتاج لِرْبَايـة
    معمول للجهل هوايـة
    نسمع في الزنقة كلامك
    شبِّيح وعامل لي عفيف.




    ترقع بالصوت حيَّاني
    وتقول أنا كاني وماني
    والحقني يا عم شلاطة
    وِتْلِتّ وتعجن تاني
    والكل ف نظرك جاني.
    ويقول "فَقَعُوا النُّفِّيخَـة!"
    باللهِ دا عقله نضيـف؟




    نازل حرب فْ طواحين
    ويقول "جَهَلَة وحاقدين
    لو كل الدنيا فْ كفة
    أنا وحروفي الفايزين!"
    ع البطحة يحط يمين
    مش برضه دا مخُّه تخين،
    وكلامه دا زيُه سخيف؟




    "ممنوع حد يقرَّب لي
    إلاَّ انْ كان هايْطَبْطَبلي
    أصل انا حساس ع الآخر
    فنَّان وأديب وفَواعْلي
    ومافيش بعدي ولا قَبْلي."
    واللهِ دا مخُـه طراوة
    من غير تركيب تكييف.
    د. أحـمـد اللَّيثـي
    رئيس الجمعية الدولية لمترجمي العربية
    تلك الدَّارُ الآخرةُ نجعلُها للذين لا يُريدون عُلُوًّا فى الأَرضِ ولا فَسادا والعاقبةُ للمتقين.

    فَعِشْ لِلْخَيْرِ، إِنَّ الْخَيْرَ أَبْقَى ... وَذِكْرُ اللهِ أَدْعَى بِانْشِغَالِـي

يعمل...
X